Malaysia lal thar Sultan Ibrahim la lut

Malaysia ram lal thar atan kum 65 mi Johor Sultan Ibrahim Iskandar chu nimin khan lak luh a ni a, Malaysia lal 17-na a ni.

Lal thar lak luh inkhawm hi an ram khawpui, Kuala Lumpur-a National Palace-ah neih a ni. Malaysia ramah hian lal thlah kal zel chhungkua pakua aṭangin an ram lal tur hi kum nga dan zelah an inthlak kual ṭhin.

Nimina Malaysia lal 17-na atana lak luh, Sultan Ibrahim hi chhim lam, Jorhor state lam lal chhungkuaa mi a ni. Nawmsakna lam ngaina tak niin, luxury car leh motor bike tam tak la khawmin, luxury car bik pawh 300 vel zet a nei nia sawi a ni. Real estate aṭanga mining thlengin sumdawnna lam pawh a nei a, an chhungkaw hausakna hi USD tld 5.7 hu vel nia chhut a ni. Malaysia rama cell service provider lian ber zinga mi, U Mobile-ah share 24% neiin, private leh public company hrang hranga investment a tih hi USD mtd. 588 a tling nia sawi a ni bawk.

Sultan Ibrahim hian Singapore-ah ram, USD tld. 4 hu neiin, Botanic Gardens bula ram zau tak, Tyersall Park neitu a ni bawk.

Malaysia lalte hi politics lamah an inhnamhnawih ngai vak lem lo a, sorkar inrelbawlna kawngah pawh an thuneihna hi a hming mai nia sawi a ni. Prime Minister leh cabinet thurawn angin an kal ber ṭhin. Mahse an ram chhung politics buaina thleng chho fo avangin lal hi chanvo pawimawh pek chhoh a ni. Prime minister a ruat phalsak a ni a, hei bakah hian thiam loh chantir tawhte a ngaidam thei bawk a ni.