UNRWA hi tihtawp a ngai - Israel PM Netanyahu

Israel Prime Minister Benjamin Netanyahu chuan Gaza Strip-a beihpui an thlak chhunzawm mek karah, UN Palestinian Refugee agency, UN Relief and Works Agency for Palestinian Refugees (UNRWA) chu tihtawp a, chhawmdawlna thawk pawl dangin an thlak a ngaih thu a sawi.

Hamas-in Israel mi an hrente chhuah an nih theih nan leh, inkahhai puan a nih theihna tura inbiakna kalpui reng ni mah se, Israel leh Hamas-te hian an inbeihna hi an chawlhsan chuang lo a ni.

Israel chuan October 7-a Hamsa firfiakte'n Israel chhim lam beia, rawng taka an chetnaah khan UN hnuaia Palestinian refugee chhawmdawl hna thawktu pawl, UNRWA mi leh sa eng emaw zat inrawlh an awm ngei tih a lo sawi tawh a ni. Hei vang hian chhawmdawlna pe ṭhin, US leh ram dangte chuan UNRWA ṭanpuina an pek ṭhin hi an titawp lailawk nghal bawk.

Prime Minister Netanyahu chuan,"Khawvel ram hrang hrang leh UN ngei pawh hian UNRWA hnathawh hi tihtawp a ngai a ni tih hria se ka duh" a ti a, Gaza Strip buaina chu chinfel thuai an duh a nih chuan UNRWA chu chhawmdawl hna thawk ṭhin pawl dangin an thlak a ngaih thu a sawi.

Palestinian lam chuan Israel hian UNRWA hmingchhiat theih nan dawt hmangin an puh niin an sawi thung. UNRWA chu 1948-a Israel ram a pian dawn avanga raltlan tam tak chhawmdawl tura din a nih thu sawiin, tuna an buainaah pawh Gaza mipui tam zawk chuan an ni tin mamawh thlen nan bera an hman thu an sawi. UN Secretary-General Antonio Guterres pawhin UNRWA chu Gaza-a chhawmdawl hna thawh kawnga thawhhlawk tak an nih avangin ram hrang hrangte chu an ṭanpui pek ṭhin titawp lo turin a lo ngen tawh bawk.

Khawvela ram thiltitheiho chuan buaina punlun zel tur hi dan tum viau mah se, Middle-East boruak hi a la ṭang ṭha hle. Houthi helpawlin Palestinian mipui an thlawp zia lantir nan US leh British indo lawngte chu Red Sea-ah beih zel an tum thu an sawi a, US leh Iran inlaichinna pawhin ṭhat lam a pan hlei thei lo. US sipai pathum chuan Jordan-ah drone hmanga beih an tawh avangin nunna an chan a, hei hi US lam chuan Iran thlawp firfiak pawlte tih ngei niin a ngai. US lam hian an chhan let dan tur sawi rih lo mah se, Iran Revolutionary Guards-te chuan US-in a vauna chu chhan let zel an tum thu an sawi lawk tawk thung.

US-in UNRWA fund pe chhuak duh rih lo

United States chuan UNRWA ṭanpuina tura USD nuai 3 a pek tur chu pe chhuak duh loin a dang rih.

Israel-in Hamas-te'n October 7-a Israel chhim lam an beih ṭuma UNRWA mi leh sa an inrawlh nia an puhna chu chhui chian mek a ni a, hemi chungchang chhui a nih chhung chuan fund pek tur hi an titawp rih dawn tih State Department thupuangtu, Matt Miller chuan a sawi. US hi UNRWA tana fund pe hnem ber ṭhin niin, sorkar kum kal mekah hian UN agency tan hian USD mtd. 121 vel a pe tawh a ni.

UNRWA hnena sum chhung lut ṭhin, US leh ram dang 34-te chuan UN hotu, Antonio Guterres hmuin, UNRWA puh a nihna hrang hrangah eng angin nge UN chuan a hma a lak tawh tihte an sawipui an tum.