Myanmar sipai sorkarin state of emergency pawtsei

Myanmar sipai sorkar chuan Nilaini khan an ram puma state of emergency an puan chu thla ruk dang atan a pawtsei.

Sipaite hian kum thum liam ta khan an rama civil sorkar rorelna thuneihna hnehchhuhin sorkar an siam a, sipai rorelna hi duh loin tualchhung buaina nasa tak a chhuak zui bawk. Tun thleng hian an ram chhung buaina hian ziaawm lam a pan thei lo.

Sipai sorkar duh loa tualchhung buaina a chhuah hnuah, sipaite hnena thuneihna sang zawk pekna turin ram pumah state of emergency hi puan a ni a, hei hi vawi tam tak pawhsei a ni tawh bawk.

Rorel lai, National Defence and Security Council chuan ram chhung dinhmun thlirin member-te chuan emergency pawhsei chhunzawm zel hi an remti tlang vek a ni. Meeting zawhah hian acting president U Myint Swe chuan thla ruk dang emergency pawhsei a nih thu hi a puang a ni.

Sipai sorkar duh loa nawrh huaihawtte laka beihpui thlaknaah, sipaite hian mi 4,400 chuang an that tawh niin local monitoring group chuan a tarlang. Nikum kum tawp lam aṭang khan hnam pawl hrang hrangte chuan sipaite hi na zawkin an bei leh a, heng hnam pawlte hi sipai sorkar dodaltute chuan an thlawp a ni. India, Thailand leh China ramriahte helpawl leh sipaite inbeihna hi a thleng fo a, military post eng emaw zat chu helpawlte hian an laksak tawh a ni.