Malaysia-a raltlan dahna hmun aṭangin Rohingya mi eng emaw zat tlan chhuak

Malaysia chuan Myanmar aṭanga raltlan, Rohingya mi leh mi dang eng emaw zat, an ram chhim lama raltlan dah lailawkna tura an siam, detention centre aṭanga tlan chhuak an awm thu leh, an zawn mek thu an sawi.

Malaysia immigration department chuan Perak state-a Bidor facility aṭanga raltlan tlan chhuak zingah hian Rohingya mi 115 leh Myanmar mi tho mi 16 vel an tel thu sawiin, immigration department director-general, Ruslin Jusoh chuan anmahni zawng tur hian police 375 bakah, sipai leh reservist eng emaw zat tirh chhuah an nih thu a tarlang.

Heng raltlante, detention centre aṭanga an tlan chhuah chungchang hi immigration department chuan sawi fiahin,"Ningani zan khan Perak hmar lama Bidor facility-ah buaina a chhuak a, inpawng chilna a thleng a ni. Hemi avang hian mi 131-te chuan he camp hi an tlan chhuahsan a, an tlan chhuahna kawnga north-south highway kawngpuiah mi pakhat motor-in a chil a, a thi bawk a ni," tiin an tarlang.

Malaysia hi Muslim Rohingya raltlante pan nasat ber hmun a ni a, raltlan tam zawk hi Bangladesh mi niin, Myanmar leh Bangladesh-a refugee camp hrehawm tak tlansan a, tuipui hlauhawm tak kana Malaysia pan ṭhin an ni. United Nations High Commissioner for Refugees (UNHCR) chuan nikum chhung khan Bangladesh aṭanga lawng hmanga Southeast Asia ram pana kal mi 500 chuang chu an thi niin an sawi.

Kum 2023 chhung khan Malaysia ramah hian UNHCR hnuaia raltlan anga chhinchhiah mi 185,300 awmin heng zinga 88% hi Myanmar lam mi an ni.