North Korea-in missile enchhinna an kalpui zel

South Korea sipai hotu chuan North Korea-in nimin khan a ram khawchhak lam tuipuiah cruise missile tam tak a kap chhuak leh tih a sawi.

US, South Korea leh Japan ram nen an inkar boruak rip tak karah North Korea-in an missile neih enchhinna an kalpui chhunzawm zel avang hian an inkar boruak hian ziaawm lam a pan mai a rinawm loh a ni.

North Korea ram hotu lu ber, Kim Jong Un-a'n an ram thu thar thehdarhtute hmaah an ram lawng sipai (Naval forces) tihchak a tum thu a sawi hnu lawkah missile enchhinna hi neih a ni. Kim Jong Un hian indo lawng thar neih an tum thu leh chutiang hmalakna chu indo hmachhawn tura an inralrinna kawngah a pawimawh thu a sawi. Heng bakah hian hian nuclear chakna hmang thei tura an lawng sipaite thuamchak an mamawh thu a lo sawi fo tawh bawk.

South Korea Joint Chief of Staff chuan US leh South Korea chuan uluk taka North Korea chet dan an vil reng thu sawiin, Zirtawpni-a an missile enchhin hi kum 2024 a a ṭum 4-na a nih tawh thu an sawi. January-a Kim Jong Un-a'n Nampho shipyard a tlawh hnu lawkah North Korea chuan ralthuam pholanna an neih bakah, an tuihnuailawng aṭangin missile kap chhuak a, an enchhin avangin ram ṭhenawm nen an inkar boruak a sosan phah hle a ni.