France-a loneitu pawlte'n an nawrh titawp

France-a loneitu pawlte chuan kar hnih chuang nawrh an huaihawt tawh chu Prime Minister Gabriel Attal-a'n an thil phut chungchanga ruahmanna thar a siamte a tlangzarh hnuah an titawp.

France rama loneitute hian hlawh tlem lutuk te, inkaihhruaina mumal lo lutuk leh, ram pawn aṭanga induhsakna awm chungchangahte lungawi lohna lantirin nawrh an huaihawt a, ram chhung hmun hrang hrangah kar hnih chhung kawngpui an dang a ni. France rama loneitute nawrhna hi Europe ram danga loneitu pawl eng emaw zatin an zawm bawk.

Khawpui pawn lama loneitu pawl lian ber, FNSEA hotu, Arnaud Rousseau leh Young Farmers (JA) president, Arnaud Gaillot-te chuan Ningani khan press conference neiin, nawrh an huaihawt mek chu an tihtawp thu hi an puang a, hei hi Prime Minister-in pawisa pek leh thlai thar chungchanga inkaihhruaina thlah dul bakah, ram pawn lam aṭanga induhsakna thleng ṭhin laka loneitute zawng zawng venhimna tur ruahmanna siam a tiam avang niin an tarlang.

Attal chuan,"France hian European Union (EU) pawn lam aṭanga thlai leh thei, rannung thahna hlo, Thiaclopride hmanga enkawlte lak luh chu a dang nghal dawn a ni. EU hmun danga rannung thahna hlo hman phal ang chi chu France-ah pawh phal a ni ve vek tawh ang," tiin a sawi. Ran vulhtute puihna tura tan USD mtd. 162 ruahman a nih thu leh, farm tax pawh tihhniam a nih dawn thu a sawi. Agriculture minister Marc Fesneau pawhin loneitu tan loan pekna turin fund, USD tld. 1.16 package siam a ni tih a sawi bawk.