Kenya-a gas puakah mi pathum thi, mi 300 an hliam

Kenya khawpui Nairobi-a Embakasi district-ah gas phur motor puakin, mi pathumin nunna an chan a, mi 300-in hliam an tuar bawk. Gas puak avang hian kangmei nasa tak chhuakin chenna in, sumdawnna dawr leh lirthei eng emaw zat a kang bawk niin sorkar thupuangtu chuan a sawi.

Embakasi police hotu, Wesley Kimeto chuan gas puak avanga thi zingah hian naupang pakhat a tel thu tarlangin mitthi hi a zat chiah hriat a la nih loh thu leh la pun belh thei a nih an rin thu a sawi. Gas puak avang hian in eng emaw zat a kang a, gas cylinder thlawkin gas puahna hmun bul hnaia in leh dawr eng emaw zat a deng bawk niin sorkar thupuangtu, Isaac Mwaura Mwaura chuan a sawi bawk.

Hetih lai hian Kenya Red Cross chuan mi 271 damdawi inah an hruai tawh thu leh, mi 27 chu a gas puahna hmunah hian an enkawl nghal thu an tarlang. Hliam tuar zingah hian thawk lama harsatna neih phah eng emaw zat awm bawkin, an zingah hian naupang 25 an tel a ni.

Kenya Red Cross hian kangmei ṭhelh tum hian nasa taka an thawh mek thu sawiin, Isaac Mwaura Mwaura chuan chhanchhuah hna thawk chhunzawm thei tura ruahmanna siam zel a nih thu a sawi bawk. Kenya sorkar chuan gas puak hi gas plant-a thleng niin a sawi a, gas puahna chhan erawh hriat a la ni lo thung.