Imran Khan leh a nupui thiam loh chantir leh

Pakistan Prime Minister hlui Imran Khan leh a nupui Bushra Khan-te chu Inrinni liam ta khan court-in kum 2018-a an inneih danah dan bawhchhiatna a awm nia sawiin thiam loh chantir an ni leh. Kum sarih lung in tang tura hrem an nih bakah, pawisa chawitir an ni bawk.

Imran Khan hian tun hnaiah hremna a tawk ngun hle a, kar liam ta chhunga court-in thiam loh a chantir ṭum thumna a ni nghe nghe. Pakistan ramin tunkar Ningania inthlanpui a hmachhawn turah hian Imran Khan hi inthlan a chuh ve phalsak a ni lo a ni.

Khan hi an ram thuruk tiput rua puh a nih avangin kum 10 tang tura hrem a nih bakah a nupui nen Prime Minister a nih laia an thilpek dawn an hralh avangin kum 14 tang turin a chungthu an lo relsak tawh bawk.

An inneih chungchanga thiam loh chantir an nihna chhan hi Bushra Khan chuan muslim sakhaw dana 'Iddat' an tih, pasal ṭhen tan pasal dang an neih leh hmaa nghah tur hun chhung an siamsak chu an nghah chhuah hmain Imran Khan nen hian an inneih avang a ni. Imran Khan leh a nupui hi an ram pawisa Rs. nuai 5 chawi turin an ti bawk a ni.

Imran Khan leh Bushra Khan-te hian inneihna thuthlung 'nikkah' an tih ziak turin a rukin ceremony huaihawtin, January 2018 khan thuthlung chu an ziak nia puh an ni. Khan-te nupa erawhin hei hi an pha thung a, eng dan mah an bawhchhiat loh thu an sawi.

PM hlui Khan hi Rawalpindi-a jail-ah a tang mek a, a nupui erawh Islamabad-a an chenna inah khunghran a ni thung. Imran Khan hian an hremna thar hi a hmaa mi nena chhiar zawm tur nge a hranpain an hremna thar hi a hmachhawn dawn tih chu sawi chian a la ni lo.