Chile ram kang vangin mi 46 thi tawh

Central Chile-a mipui chenna hmun lun tak chhehvela ram kang avangin mi 46 an thih tawh thu leh, chenna in 1,100 vel a chhiat tawh thu official-te chuan an sawi. Chile president, Gabriel Boric chuan TV kaltlanga ram mipuite hnena thuchah a sawinaah sawi langin, thi zat hi an la pun belh rin a nih thu a sawi bawk.

Interior minister Carolina Toha chuan Chile hmun laili leh chhim lamahte hmun 92 laiah kangmei hi a chhuak niin a sawi a,"Kangmei chhuak hi hmun dangah a kang kai chak hle a, khaw awm dan avangin thunun a har zual bawk a ni" a ti.

President Boric chuan Chile mipuite chu chhanchhuah hna thawktute thu zawm tura chahin, Valparaiso region-ah chuan kangṭhelhtute tana ṭhelh harsa lai takah, hmun li lai nasa takin a kang mek niin a sawi. "Khawi lai hmun pawh chhuahsan tura tih in nih chuan rang takin chhuahsan ang che u" tiin a ngen. Valparaiso region hi kangmei chhuah nasatna lai ber hmun niin, helai chhehvela cheng mi tam tak chuan an chenna an tlansan tawh.

Minister Toha chuan Quilpue leh Villa Alemana khaw chhehvela kangmei chhuakah ram hectare 8,000 chuang a kang chhe tawh niin a tarlang a, kangmei pakhat hian tuipui kama resort town, Vina del Mar chu dinhmun hlauhawm takah a dah bawk niin a sawi. Kangmei chhuak avang hian Villa Independencia-ah chuan in leh lirthei tam tak a kang chhe tawh a, khaw pum chu mei vapin a chhilh bawk.

Valparaiso region-ah hian mipui tawm himna tur hmun thumah siam a ni tawh a, kangmei ṭhelh tur hian helicopter pakua leh kangṭhelhtu 450 tirh luh an ni tawh bawk. Official-te chuan kawngmei chhuak avang hian eng pek chhuah theih a ni lo niin an sawi a, damdawi in pali chu chhuahsan ngaiin a awm hial tawh bawk a ni.