Pakistan : Police station beihnaah mi 10 an thi

Pakistan Draban region, Khyber-Pakhtunkhwa province-a police station chu nimin zing varṭian khan firfiak ni ngeia hriatte'n sniper hmanga an kah hnuah station luhchilhin an bei zui a, mi 10 an thi a, mi dang paruk an hliam bawk.

Draban Dy. SP Malik Anees ul Hassan chuan firfiakte hian station chhungah grenade-te an hmang niin a sawi a, hei vang hian thi leh hliam an tam phah niin a sawi. Station an rawn beih chhan hi hriatchian a la ni lo.

Pakistan hian tunkar hian inthlanpui an hmachhawn dawn avangin tharum thawhna pawh a hluar niin police-te chuan an sawi. Kar liam ta Nilaini khan Khyber-Pakhtunkhwa-ah hian inthlan hmachhawn tum candidate pakhat chu kah hlum a lo ni tawh. Hemi ni vek hian Balochistan province-ah politician langsar tak pakhat chu an party election office-ah kah hlum ni bawkin, election rally neihnaah bomb puak avangin Thawhlehni khan mi paliin nunna an chan bawk. Heng pawikhawihnate hi Islamic state helpawl chuan an tih a nih thu an sawi.

Darban hi Jamiat Ulema-e-Islam party te ṭhatna hmun a ni a, an party leader Maulana Fazal Ur Rehman pawh thla hmasa khan Afghanistan-ah Taliban hotute hmu turin a zin niin thuthar thehdarhtute chuan an sawi. Jamiat Ulema-e-Islam party hian venhimna a ṭha tawk lo nia an hriat avangin Pakistan ram inthlan tur pawh sawn an duh thu an lo sawi tawh.

Pakistan hian Islamist firfiakte chetna hi 2022 hnu lamah an tuar zing hle a, a bikin security lama thawktute chu an bitum deuh ṭhin.