Samsung hotupa Lee Jae-yong in thiam a chang

Samsung chairman Lee Jae-yong chu 2015-a company pahnih inchhunfin chungchanga sum tichingpena puhnaah thiam a chang.

Seoul Central District court chuan nimin khan thutlukna tichhuakin, stock price tidanglam leh account khawih chingpen nia puhnaah Lee Jae-yong chuan thiam lohna a nei lo tih a sawi. He case hi South Korea ram chhunga company lian ber kaihhnawih thil a nih avangin ngaihven a hlawh hle a ni.

Thubuai theh luttu lam hian kum 2015 a Samsung C&T leh Cheil industries chhunfin an nih khan Lee tan hamṭhatna a awm bakah company chhunga a thuneihna a sawh ngheh phah sawt a ni, an ti. Mahse court erawh chuan company pahnih chhunfin chuan dan an bawhchhe ngei tih finfiahna mumal tak a awm loh avangin thutlingah a pawm lo thung. Lee pawhin tih dik loh engmah a neih loh thu leh, company chhunfin chu sumdawnnaa an kalphung pangngai a nih thu a sawi. Thubuai theh luttute hian court sang zawkah an appeal dawn em tih an la sawi lo.

Samsung company hotupa hi a pa company rochuntu a nih theih nan President thamna a pek avangin kum 2017 khan thiam loh chantir a lo ni tawh a ni. Thamna sum USD mtd. 6.4 chu hetih laia president Park Guen-hye leh a thawhpuite pein, sorkar puihnaa Company rochun a tum avangin kum nga chhung lung in tang tura hrem a ni a, mahse, a tan hun chhung hi thla 30 a tihtlemsak niin kum 2021 khan chhuah zalen a ni. He thubuai avang hian Park Guen-hye kaihhruai sorkar chu paihthlak niin, amah ngei pawh hi kum 20 lung in tang tura an hrem bakah USD mtd. 14 chawitir a ni bawk a ni.