Senegal inthlan hun sawn, police leh nawrh huaihawtte intibuai

Senegal president, Macky Sall-a'n February 25-a an ram President thlanna neih tura ruahman chu thu leh awm hma sawn a nih thu a puan hnuah, Pathianni khan Senegal khawpui, Dakar-ah mipui lungawi lo pung khawmin nawrh an huaihawt. He nawrh huaihawtnaa kalte leh Dakar police-te chu innawr buaiin, police-te hian eptu party hruaitu pakhat an man.

President Macky Sall hian kar hmasa Inrinni khan President thlan tura candidate siam chungchangah harsatna a awm thu sawiin, president thlan hun tura ruat, February 25 chu sawn a nih thu ram mipuite hriatah a puang a, inthlan neih hun tur erawh a puang tel lo thung.

Inthlan hun sawn a, inthlan ni tur thar ruat tel a ni lo chu eptu party lamin an lungawi loh thu an sawi hnuah Senegal khawpui, Dakar-ah mipui eng emaw zat an pungkhawm nghal a ni. Mipui pung khawmte hi eptu party-te chuan an dikna chanvo humhim tura fuihin, inthlan hun sawn chu Senegal mipuite tana thil hlauhawm tak a nih thu an sawi. Inthlan neih turah hian eptu party candidate hi 19 an awm a, an vai hian anmahni ṭantu mipuite chu pungkhawm turin an hrilh a ni. Nawrh huaihawt hi nimin pawh khan Senegal Parliament kawtah kalpui chhunzawm zel a la ni. President Sall-a term hi April 2-a tawp tur a ni a, inthlan hun atana August 25, 2024 rawtna awm chuan Sall-a term hi a pawtsei dawn a ni.

Senegal President-in inthlan hun a sawn avang hian European Union (EU) chuan Senegal chu dinhmun him lo taka a awm phah thu an sawi a, United States pawhin inthlan hun tur ruat vat chu a ṭul thu an sawi ve bawk. France pawhin Senegal chu mipuite tana rilru nghet loa awmna hun titawp a, inthlan buatsaih vat tura a duh thu a sawi.