Chile ram kangah mi 122-in nunna chan tawh; President-in state of emergency a puang

Chile ram laili laia ram kang avangin hriat theih chinah mi 122-in nunna an chan a, ram kang hi ni li liam ta aṭang khan a inṭan tawh a ni.

Ram kang hi helicopter aṭangin tui hmanga ṭhelh hna thawh mek a ni a, kangṭhelh pawl, sipai leh khaw mite chu bungraw kang bang senghawiin an buai hle bawk.

Ram kang hi Chile ramin tun hnaia khuarel chhiatna a tawrh nasat ber zinga mi a ni a, thi leh hliam hi an la pun ngei rin a ni. Central region-a chengte chu inthiarfihlim tura hriattir an ni tawh a ni. Chilean National Disaster Prevention and Response Service chuan tunah hian ram kang hi hmun 161 velah a thleng mek niin an sawi.

President Gabriel Boric chuan ram kang avang hian state of emergency a puang a, tuipui kama khaw ṭhenkhat Valparaiso leh Vina del Mar te chu meikhuin a tibuai hle tih sawiin thih phah hial an awm thu a sawi. President chuan thi leh hliam chu an pun belh a hlauh thu sawiin, ram kang tuar mekte ni tin mamawh rang taka pek luh a nih theih nan defence ministry lam chuan sipai an thawn luh belh tur thu a lo sawi tawh bawk. Chile ram kang avang hian mi tam takin an in leh lo an chan tawh a ni.

Nikum February thla khan Chile hian ram kang nasa tak tuar tawh bawkin, ram hectares nuai 4 a kang a, mi 22-in nunna an chan a ni.