Hungary-in NATO-a Sweden lak luhna dang

Sweden-in North Atlantic Treaty Organisation (NATO) zawm a dilna chu NATO member ram hrang hrangte'n ngaihtuahin, Hungary pawhin emergency parliament session an ko a, mahse, Hungary-a rorel lai party-te chuan NATO-a Sweden lak luhna tur hi an pawm thei lo.

Hungary hian Sweden hi thlawp angin a insawi a, prime minister Viktor Orban pawhin thla hmasa khan NATO secretary general, Jens Stoltenberg hnenah a party, Fidesz chuan Sweden dilna chu remchang hmasa berah a thlawpna lantir a tum thu a lo hrilh tawh a ni. Hetih lai hian Hungary hian Russia nen hian inzawmna ṭha tak an nei reng thung a ni.

Hungary official-te chuan rorel lai party, Fidesz member-te chuan NATO zawm tura Sweden dilnaa vote lak chu Prime Minister Orban-a sawmna anga Sweden prime minister, Ulf Kristersson-a'n Hungary a tlawh hma chu an remtih loh tur thu an sawi. Sweden prime minister, Kristersson erawh chuan Hungary hian Sweden-in NATO-a tel a dilna an pawmpui hma chu Hungary tlawh a tum loh thu a sawi ve thung.

Sweden-in NATO a zawmna tur, Hungary-in an dan chungchang hi US chuan an ngaihven zui reng tur thu leh, NATO-a Sweden tel chu a pawimawh thu sawiin, US himna leh NATO himna a nghawng theih thu an sawi. Hungary-a eptu party lian ber member, Agnes Vadai pawhin Sweden vote-na tur tihkhawtlai chu PM Orban-a chapo vang leh NATO leh EU inpumkhatna ngainep a, ngaihven nih a duh vang mai a nih thu a sawi bawk.

Cold war zawh hnuah khan Sweden hian khawi ram nen mah ralthuam leh sipai chungchanga thawhpui lo turin thutlukna a siam a ni. Mahse kum 2022-a a ṭhenawm ram, Russia-in a run hnuah Sweden hian hemi kum vek hian NATO member nih hi a dil a ni.