Miss Japan-in Miss title a pe kir

Kar hnih liam taa Miss Japan atana thlan, Ukraine rama piang Karalina Shiino chuan a hnam chungchanga sawiselna a awm hnu leh, nupui nei lai a kawp thu puanzar a nih avangin Miss Japan title a pe kir.

January 22 khan kum 26 mi, Shiino hi Miss Japan atan hian thlan a ni. Ukraine-a piang niin, a nu leh pa hi Ukrainian an ni. Mahse an inṭhen hnuah kum nga mi a nih laiin a nu hian Japan mi pasal a nei a, Shiino pawh hi a nu bulah awmin a pahrawn last name hi a chhawm zui a ni. Japan ṭawng ziak leh chhiar nal takin a thiam a, kum 2022 khan naturalised citizen a ni. Naturalised citizen zingah Miss Japan ni thei hmasa ber a ni. Mahse Japan thlah dik tak a nih loh avangin Miss Japan-a thlan a ni hian sawi zui a hlawh hle a, a hnuah pasal nei lai a kawp tih puanzar a ni zui ta bawk a, duh lotu an tam hle. He thil avang hian Shiino chuan thupha chawiin, a title hi a pe kir leh a ni. Thuchhuah siamin, a fan-te leh mipuite chungah pawh ngaihdam a dil zui bawk.

Miss Japan thlannaah khan runner-up eng emaw zat awm mah se, Miss Japan title hi hlanchhawn an ni dawn lo a, he title hi kum khat chhung hnawh khah lohin a awm dawn ta a ni.