Britain lal King Charles-a'n cancer natna vei

Buckingham Palace chuan Thawhṭanni khan thuchhuah siamin, an ram lal King Charles III chuan cancer a vei a, hei vang hian a programme ruahman sa pawh ṭhulh a nih thu a tarlang.

King Charles hi kum 75 ni tawhin, thla hmasa khan a kap bawrah bawk a awm avangin enkawl turin ni thum chhung damdawi inah a awm a, hemi ṭum hian thil dang avangin test neiin a cancer tih hmuhchhuah a ni.

Buckingham Palace chuan,"Kan ram Lal chu vawiin aṭangin ngun taka enkawl ṭan a ni dawn a, doctor-te thurawn angin mipui hmachhawn rih lo turin a programme ruahman lawk pawh a sawn hla a ni. An enkawl chhung zawng hian Lal hian a office hna pangngai erawh a kalphung pangngaiin a khawih chhunzawm dawn thung a ni" a ti. Thuchhuah chuan Lal chu amah enkawltute chungah a lawm thu leh, a natna hneh ngei tumin a rilru pawh a siam a, mipui tana thawh leh vat a chak tawh thu an tarlang tel bawk. Buckingham Palace chuan,"Lal hian rinhlelhna leh zawhna mipuite'n an neih loh nan a natna hi puanzar a duh bakah, khawvel puma cancer natna vei mekte dinhmun kan hriatthiampui theih nan puanzar hi a duh bawk a ni" an ti.

United Kingdom Prime Minister, Rishi Sunak chuan an ram Lal ber chu a dam leh vat theih nan a duhsakna a hlan a,"Chak tak leh hrisel takin a lo let leh vat dawn tih hi ka hria a ni, ram mipui zawng zawng pawh hian a dam leh thuai theih nan duhsakna an hlan" tiin X lamah a tarlang. Labour Party, opposition party hotu Keir Starmer pawhin,"Kan party aiawhin kan Lal chu dam leh thuai turin duhsakna ka hlan a ni, hriselna ṭha tak nen a lo let leh thuai kan beisei a ni" tiin a sawi ve bawk.