Israel-UAE direct flight hmasa ber a thlawk ta

Israel leh United Arab Emi­­rates inkara direct commer­cial passenger flight hmasa ber chu Ben-Gurion Airport, Israel aṭangin a thlawk chhuak a, darkar thum vel a thlawh hnuah Abu Dhabi-ah a ṭum. 

Ram pahnihten thawhdunna tura inremna an siam hnuah nimin khan Israel leh UAE inkarah hian direct flight hi an thlawh tir ta a, Israel El Al airliner thlawhtheihnaah hian Israel leh US official-te an chuang a ni. UAE hi Middle East-a Arab ram zinga Israel pawmpuitu ram pathumna chiah a ni a, Inrinni pawh khan UAE hian kum 1972 aṭanga an lo hman tawh Israel 'boycott'-na dan an siam chu an lo sût tawh bawk a, thla tir lamah khan direct telephone service pawh a ṭum khatna atan an lo hawng tawh a ni. 

August 13 khan ram pahnih hian an inkarah boruak muanawm a awm theihna turin US palaina hnuaiah inremna an siam a, hei hian khawvel ram hrang hrang a barakhaih hle.

Ram pahnihin inkungkaihna ṭha an nei ta hi khawvel ram tam tak chuan lawmpui hle mah se Palestinian chuan an sawisel nasa hla a, UAE chu phatsantu ang hialah an chhuah. UAE hma hian Arab ram zingah chuan Egypt leh Jordan-in Israel hi ram an nihna an lo pawmsak tawh bawk. 

Nimina thlawhtheihna, Flight LY971-a chuang US official zingah hian US president Donald Trump makpa Jared Kushner a tel a, Israel National Security Advisor Meir Ben-Shabbat pawh a tel a ni. 

A thlawh chhuah lam flight hi UAE international dialling code aiawhin Flight LY971 tih a ni a, a let leh lam flight chu Israel international dialling code aiawhin LY972 tih a ni thung. 

Israel leh US official inkawp­te hian Emirates lam aiawhte meeting an neihpui nghal a, Israel leh UAE inkarah inkung­kaihna ṭha awmna tur chungchangte an sawi ho. 

Nimina thlawhtheihna thlawk chhuak bankah hian English, Hebrew, leh Arabic-in 'Remna (peace)' tih a inziak a ni.