Hamas-te'n inkahhai chungchanga rawtna chhang let

Gaza Strip-a indo mek Israel leh Hamas-te tana inkahhaina thuthlung thar atan rawtna siam chungchang chu Hamas lamin an chhang let tawh nia tarlan a ni.

Inkahhaina thuthlung hi Israel, USA, Qatar leh Egypt ramte buatsaih niin a kimchanga puanzar erawh a la ni lo thung.

Inremna siam rawtnaah hian kar ruk chhung inkahhai puan a, Hamas-ten Israel mi an hren mek tam zawk chhuah tura tihna pawh a tel nia sawi a ni. Israel leh US chuan an inremna duan chungchanga Hamas-te chhanletna chu an enfiah mek a ni.

US Secretary of States Antony Blinken chu Middle-East ah cham mekin Hamas te chhanna chu Israel official-te nen nimin khan an sawi ho. US President Joe Biden chuan Hamas-te chhanna aṭang chuan Hamas chuan thil an phut tam hret nia a hriat thu a sawi a, Israel hotu lam chuan Hamas thil phut chu awlsam taka an tihhlawhtlin a rin loh thu a sawi bawk.

Hamas hruaitu pakhat chuan inremna thuthlung an chhanletna chu a ṭha lam a nih thu sawi mah se Gaza cheiṭhat kawngah te, an mi leh sa him taka an let leh theihna tur leh, indona avanga an chenna hmun chhuahsana hmun danga awmte chungchangah siamrem ngai awm chu an duhdana siamṭhat an ngen thu a sawi. Heng bakah hian hliam enkawl leh damdawi-ina hruai an nih thuai theih dan tur te, in lama him taka an haw leh theihna turte a siamṭha tura an ngen thu a sawi bawk a ni.

Inremna thuthlung duan hi hi kar liamta khan Hamas hnenah thawn ni tawh mahse thil chiang lo leh hriatthiam loh a awm avangin tunkar khan an chhanglet thei chauh a ni. Qatar Prime Minister, Sheikh Mohammed Bin Abdulrahman al Thani chuan Hamas-te chhanletna chu a tlangpuiin a ṭha lam ni a a hriat thu a sawi.