Kenya-a naupang 191 thah thubuaiah sakhaw hruaitu leh mi 29 thiam loh chantir

Kenya-a sakhaw pawl pakhat hruaitu, Paul Nthenge Mackenzie leh a thurualpui, mi 29-te chu naupang 191 thah avangin thiam loh chantir an ni. Thubuai ngaihtuahtu prosecutor chuan McKenzie hian amah zuitute chu khawvel tawp hmaa vanram an kal theih nan anmahni leh an fate chu inhrek rilṭam a, intihlum turin thu a pe ṭhin niin a tarlang.

Heng naupang 191-te thah thubuai hi Indian Ocean bula Malindi tuipui kam khaw high court-ah ngaihtuah a ni a, Paul Nthenge Mackenzie leh midang 29-te hian an puhna hi an pha vek a, an zinga pakhat hi rilru lama rualbanlo a nih avangin Malindi high court-ah hian thla khat hnua inlan leh tura hriattir a ni. Mackenzie leh a thurualpuite hian naupang 191 bakah hian mi 234 te ruang chu Shakahola ramhnuaiah an phum a, heng an ruang phumte hi a vaiin 425 a ni.

McKenzie hi taxi driver a ni ṭhin a, a hnuah pastor angah inchhalin tun hmain firfiak zawnga che leh mi that ṭhina puh a lo ni tawh bawk. Amah zuitute a inhrek hlumtir hnu hian Shakahola ramhnuaiah an phum ṭhin a, an ruang phumte hi nikum April thla khan hmuh a ni ta a ni. Ruang endikna tarlan a nih danin mitthi tam zawk hi rilṭam vanga thi an ni a, naupang ṭhenkhat hi vuak leh sawisak emaw, reh hlum emaw an ni bawk. He thubuai hi “Shakahola forest massacre” tia hriat a ni.