Israel-in traffic light hmangin Covid-19 darh tur ven an tum
Israel rama Covid-19 hri a darh zel tur venna tur, traffic light hmanga ruahmanna siam chu Pathianni khan Israel-a Corona Cabinet chuan a remti tih Prime Minister Office leh Ministry of Health chuan thuchhuah inṭawm siamin an tarlang.
Covid-19 vanga inkhuahkhirh dan siam chu tualchhung thuneitute kutah a awm a, anni hian hri leng darh nasat dan azir ang zelin hri darhna hmunte chu red, orange, yellow leh green zone-ah an siam ang. Kar tina hri kai awm zat ang zelin khua leh veng hrang hrangte chu grade 0-10 siamsak zel tur an ni bawk.
Thuneituten grade an pek 7.5 chunglam chu hri darh nasatna hmunah an puang a nga, chu mi hnum chu traffic light-a red zone-ah puan a ni ang. Grade 6-7.5 inkar chu orange zone-ah puan a ni dawn a, grade 4.5-6 inkar hi yellow zone-ah an puang thung ang. Hei bakah hian grade 4.5 hnuai lam chin chu green zone-a puan tur a ni thung.
Red zone-a awm bial chhungah chuan mipui 20 aia tam punkhawm khap a ni dawn a, indoor chhungah chuan mi 10 aia tam punkhawm phalloh a ni bawk ang. Green zone-a awm bial chhungah chuan outdoor-ah mipui 250 ai tam punkhawm khap a ni a nga, indoor-ah chuan mi 100 ai tam khap a ni ang.
Heng ruahmanna te hi September 6 aṭanga hman tur a ni. Israel-ah hian Covid-19 hri kai mi 1,14,020 an awm tawh a, heng zinga mi 92,796 chu enkawl dam tawh niin, thihpui hi mi 919 an awm tawh a ni.