Helicopter chesualah Chile President hlui a boral

Chile President term hnih lo chelh tawh, Sebastian Pinera chu helicopter chetsualah a boral.

President hlui Pinera (kum 74) leh mi dang pathum chuanna helicopter hi Chile chhim lama dil pakhatah tla lutin chhanchhuaktu team an thlen hnu lawkah Pinera hi a thih thu an puang a ni. A chuanpui midang pathum erawh an damchhuak thung. Pinera thih thu hriat a nih hnu hian Latin America ram hrang hrang hruaitu ten Pinera an ui thu leh pawi an tih thu an sawi a ni.

Pinera hian khawvel chhimlama nipui an hman lai chuan nipui chawlh hmang turin Chile chhim lama dil mawi tak tak awmna lam a pan ṭhin a, helicopter pawh amah hian a khalh mai ṭhin. Tuna an chetsualna helicopter pawh hi Pinera a khalh nia sawi ni mah se thuneitu lam chuan Pinera in a khalh thu emaw, khawi lam nge pan an tum tih chu an la sawichianglo thung.

Chile President Gabriel Boric chuan Pinera hi ni thum chhung sun a nih tur thu a sawi a, Zirtawpni hian vui a ni ang. Chile Interior Minister Carolina Toha chuan "ram tan a inpekna te kan hre reng tawh ang" a ti.

Pinera hian kum 2010-a Atacama thlalera khur chim vanga leihnuaia thawktu mi 33 tang an chhanchhuahna kawnga a thawhṭhat em avangin khawvelin a hriat lar phah hle a, he thil thleng behchhan hian 'The 33' movie pawh siam a ni nghe nghe a ni.

Chile ramchhungah chuan sumdawng hlawhtling tak anga hriat hmasak niin President term a chelh hmasak ṭum hian an ram sum dinhmun chu a ṭhang chak hle. Hemi rual hian Chile ram mipuite nen inlaichinna ṭha a siam theih loh avangin sawisel a tawk ve fo ṭhin. President hna a chawlhsan hnu pawh hian Pinera hian politics a chawlhsan chuang lo a, thil thleng hrang hrangah a ngaihdan a tarlang ṭhin a ni.