Virus kaihhnawih thilah China-ah mi 5,000 dawn man

China state prosecutor office chuan kumin January thla aṭang khan Covid-19 kaihhnawih thilah mi 5,800 dawn man an ni tawh tih a sawi.

Heng an mante hi health worker kutthlak leh thata puh te, medical equipment ṭha tawk lo hralh te, an zinna leh kalna chin dik loa sawite an ni. Man zinga pakhat chu dawra thil lei pakhat, mask vuah tura hrilhtu chunga thinrima a thah vang a ni. Mi ṭhenkhat chu hri kaite enkawlna tura sum thawhkhawm tichingpute an ni bawk. 

Supreme People's Procuratorate office chuan hri leng kaihhnawiha dan kalha thilti mi 5,797 man an ni tawh a, mi  6,755 chu thubuai siamsak an ni bawk tih a sawi. 

China hi Covid-19 len ṭanna ram ni mah se, hri leng darh tur venna atana khuahkhirhna khauh tak a hmang a, contract tracing-te a neih ṭhat avangin hri leng hi an thunun thei tawh a ni. Contact tracing chak zawka kalpui a nih theihna turin smartphone apps hrang hrang a siam bawk. Supermarket, cinema hall leh public transport-ahte mask vuah ngei ngei tura tih a ni a, hmun danga vuah tura tihna kher loah pawh mipuiten hri laka invenna atan an vuah chhunzawm zel bawk.