TikTok-in ama thuin an app hralh theihna a nei lo
US-a Microsoft Corporation chuan TikTok lei tum mah se, China dan tharah chuan an ram chhunga company-te chuan China sorkar phalna loin an thil an hralh thei loh tih a chuang.
Kar liam ta Zirtawpni khan China chuan an rama technology company list ho thlir letna a nei a, he hunah hian China sorkar chuan kum 12 hnua a vawikhat nan an ram technology company khap (ban) ngai leh khuahkhirh ngai a siam a ni. Heng company zingah hian TikTok siamchhuaktu ByteDance pawh a tel a, an TikTok hi tute hnenah mah an ram sorkar phalna la lo chuan an hralh thei ta bik lo a ni.
Hemi chungchangah hian Beijing-a University of International Business and Economics-a international trade professor Cui Fan chuan ByteDance-in anmahni siamchhuah technology hrang hrangte chu an thawnchhuak duh emaw ramdanga sumdawnna an kalpui duh emaw a nih chuan sorkarah phalna an lak a ngaih thu a sawi.
China-a technology company laka khuahkhirhna an siamah hian item 23 an telh a, heng zingah hian personal information push service te, artificial intelligence interactive interface technology te pawh a tel. Khuahkirhna dan hi siam mah se technology company-te hian ni 30 chhungin sorkarah phalna an dil thei a ni.
August 6 khan US president Donald Trump kaihhruai sorkar chuan thupek tichhuakin, Chinese apps TikTok leh WeChat-in US digital network a thlunzawmna a neih zawng zawng chu ni 45 hnua titawp vek turin a hriattir a, heng app kaltlang hian US mi personal data chu China chuan a hre thei nia an rin vangin khap an tum a ni.
Trump chuan TikTok app chu Microsoft Corporation hnena an hralh theih nan ni 45 chhung hun pek a remti a, a rem tih aṭanga an ni 45 chhunga an hralh hman loh chuan September 15 aṭangin TikTok hi US-a khap zui tum a ni.