Israel PM-in Hamas rawtna a hnawl : Rafah lut tura inpuahchah turin thupek tichhuak

Israel prime minister Benjamin Netanyahu chuan inkahhai puan tur chungchanga Hamas lam rawtna chu a hnawlsak. Gaza Strip-a beihpui an thlak mekah, thla thum chhungin hnehna an chang thei tawh dawn niin a sawi.

US, Qatar leh Egypt-ten inkahhai puanna tur thluthlung an duan, Israel-in a thlawp chu Hamas lam hian an zirchian hnuah eng emaw zat siamṭhat an rawt a ni. Mahse hei hi PM Netanyahu chuan a pawm thei lo tih sawiin, Hamas nena inbiakna neih chuan khawi hmun mah a thlen lo a, an thil phutte chu thil awm ang lo tak tak a nih thu a sawi zui. Hetih lai hian Hamas leh Israel-ten inkahhai an puan theihna tur hian inbiakna erawh neih chhunzawm pui reng an la ni.

Netanyahu chuan news conference a neihah Hamas ho rawtna hi a hnawl thu sawiin, 'Buaina chinfelna dang a awm lo, hnehna chan hi a ni mai," tiin, 'Hamas-te hi Gaza-ah an awm chhunzawm zel a nih chuan, eng hunah nge pawikhawihna rapthlak tak an rawn thlen leh ang tih chu zawhna awm reng tur a ni," a ti. Gaza himna tur thlen thei chu Israel chauh a ni tiin, Hamas firfiak pawl lo pui ṭhin nia sawi, UN agency for Palestinian refugees, UNRWA pawh thlak a phut nghal bawk.

Prime Minister Netanyahu hian Hamas-te rawtna a hnawl thu a sawi hnuah, Israel sipaite chu Gaza-a Rafah khawpui luhchhuah tura inbuatsaih turin thupek a ti chhuak zui bawk. TV-a thu a sawiah, PM chuan sipaite chu operation nei tura inbuatsaih tura thu pek thu leh, Hamas laka hnehna pumhlum an chan thuai tur thu a sawi.

PM thusawi avang hian Rafah-a chengte an hlauhthawng nghal hle. He khawpui hi Gaza Strip-a mihring bitna ber khawpui niin, Gaza mipui maktaduai 2.4 zinga a zahve dawn chu Rafah-ah hian an khawsa mek nia sawi a ni.