Myanmar sipaiten biak-in an beih chungchang chhui chian phut

Rights group, Amnesty International chuan Myamnar sipaiten January 7-a biak-in inkhawm lai bomb hmanga bei a, mi 17 an thih phahna chu chhui chian an phut tih an tarlang.

Amnesty chuan kumin January 7 khan Myanmar air force chuan Sagaing biala Kanan khuaah St Peter Baptist Churh bula hmun pathumah bomb an thlak tih sawiin, hemi finfiahnna thlalak leh video te pawh a awm bakah, thil thleng mita hmutute pawh interview neihpui an nih thu nimin khan thuchhuah siamin an tarlang a ni.

Myanmar sipaite chuan he thil thlengah hian inhnamhnawihna an neih loh thu leh, bomb thlakna hmun nia sawi leh an sawi hunah hian sipai thlawhtheihna pawh a kal loh thu an lo sawi tawh a ni.

Mahse rights group chuan thlalak leh video aṭangin sipaite pawikhawihna thlen ngei a ni tih finfiahna a awm tih an sawi thung a, video aṭang pawhin airstrike neitu hi A-5 fighter jet a nih thu leh, China siam thlawhtheihna hi sipaite chauhin an neih thu an sawi. Satellite image aṭang pawhin Mandalay bula Tada-U airbase-a A-5 thlawk chhuak lai leh, Kanan khaw beih a nih hnuah a ṭum leh laite pawh a lan thu an sawi bawk.

Amnesty crisis response programme director, Matt Wells chuan, "Myanmar sipaiten civil mite an beihna chu tawp chin a la awm lo a ni," a ti. Hetianga civil mi beih an nihna hi war crime anga chhui chian an phut thu leh, UN Security Council chu International Criminal Court (ICC)-a Myanmar chungchang thlen tura an duh thu a sawi. "Pawikhawihna rapthlak tak thlentute hi international law hnuaiah an chungthu ngaihtuah sak an ni ngei tur a ni," a ti.