Pakistan ram inthlanpui nei, ram pumah mobile service titawp

Pakistan ram inthlanpui chu nimin khan neih a ni a, inthlan ni hian boruak ṭha lo awm thei tur venna atan ram pumah mobile service tihtawp a ni.

Interior ministry thupuangtu chuan thuchhuah siamin, tun hnaiah Pakistan ramah pawikhawihna a thleng fo a, nunna hlu tak eng emaw zat chan a ni tawh a, hei vang hian dan leh thupek khauh taka kenkawh a ṭul tih a sawi. Afghanistan leh Iran nena an ramrite pawh khar vek a ni bawk.

Eptu lam chuan mobile service tihtawp a ni chu na takin an sawisel a, mipui nawlpui pawhin harsatna an tawh phah tih an sawi. Pakistan People's Party (PPP) hruaitu, Bilawal Bhutto Zadari chuan election commission leh court-ah mobile service tihnun tir tur hian a ngen a ni.

Vote thlak hun hi an ram huna nimin tlai dar 5 thleng khan hawn a ni. Result tihchhuah hun tur hi sawichian a ni lo a, vote thlak aṭanga kar hnih chhunga tihchhuah erawh a ngai a ni. Vote nei hi mi maktaduai 128 an awm a, heng zinga a zahve dawn chu kum 35 hnuai lam a ni.

Pakistan Parliament, National Assembly-ah hian member 336 awmin, heng aṭang hian direct-a mipuiten an thlan tur hi 266 a ni. Seat 266 atan hian candidate 5,000 chuang awmin, an zingah hian hmeichhia 313 an tel.