Russia President thlan turah Putin dodaltu Nadezhdin hnawl

Russia President thlanna neih turah Russia-in Ukraine a run chungchang dodal a, President Vladimir Putin sawisel ṭhintu, legislator Boris Nadezhdin-a'n chuh a tumna chu pawm a ni lo.

Central Eelction Commisison chuan Boris Nadezhdin-a'n candidate atana thlawptu, signature a lakkhawm tam zawk chu a dik tawk lo tiin a hnawl. Russia election danah chuan candidate nih tumte hian anmahni thlawptu signature 100,000 tal an thehlut tel a ngai. Mahse Election Commission chuan Nadezhdin-a signature thehluh zinga 9,000 chu pawm a ni lo tih sawiin, signature an thehluh zinga 5% aia tam hnawl a nih chuan candidate aṭang hian disqualify theih an ni. Hei vang hian President thlanna neih tura Nadezhdin din tumna pawh pawm a ni ta lo a ni.

Kum 60 mi, Nadezhdin hian langsar takin Ukraine an run mek tihtawp a phut thu leh, khawthlang ramte inbiakna neihpui a duh thu hi a lo sawi fo ṭhin. Election-in a signature thehluh tam zawk an pawm sak loh chungchangah pawh hun pek belh leh turin a ngen a, mahse an pawmsak lo tih a sawi. Disqualify a nih chungchang hi court lamah khin zui a tum.

Russia President thar thlanna hi March 15-17 chhung hian neih a ni dawn a, he inthlanah hian president ṭanglai, Vladimir Putin chu chak tur chiang saah ngaih a ni.