Philippines-in US sipai puihna dilah China vau

Philippines chuan South China Sea chungchangah China  nena an inkar buaina kal zelah, China hian a bei a nih chuan US sipai puihna an dil mai dawn tiin a vau. 

Philippines Foreign Secretary Teodoro Locsin Jr chuan ram pahnihten neitu zawk nia an inchuh, South China Sea-a an ram lawnglian awmte chu China-in a bei a nih chuan, US nena defence agreement an lo siam tawh angin US sipai puihna nen an bei let dawn tih a sawi.

Kum 1951 aṭang khan US leh Philippines hian Mutual Defence Treaty an ziak a, he inremna an siam hmang hian beih an tawk a nih chuan an inṭanpui tawn ang tih a ni.

Teodoro Locsin Jr chuan China-in dan kalh tiin vau mah se, South China Sea-a air patrol an neih chu an chhunzawm zel tur thu a sawi. "An duh chuan dan kalh tiin an sawi thei a, an rilru kan thlaksak thei lo. Mahse tribunal-ah an ṭanchhan hi hnawlsak a lo ni tawh a ni, " tiin kum 2016-a international tribunal-in South China Sea neitu nia China inchhalna a hnawlsak chungchang a sawi lang. 

Locsin chuan US leh China inkar boruak a chhiat zual zel avangin Asia-a US sipai dah chu a ṭul tih a sawi bawk.