September 17-ah Japan Prime Minister thar thlang dawn

Japan prime minister ṭanglai, Shinzo Abe-a'n a  hriselna ṭhat tawk loh avanga PM aṭanga a ban tur thu a puan avangin, a thlaktu tur thlangin September 17 hian Parliament special session neih a ni dawn. 

A zawna Japan PM din­hmun chelh rei thei ber, Abe hi tun hnaiah a hriselna a ṭha tawk lo a, damdawi-inah  pawh a kal fo a, hei vang hian a hna aṭang chawlh a tum hi a puang a ni. Mahse a thlaktu tur thlan fel a nih hma chuan PM hna hi a chelh rih ang. 

Public broadcaster NHK chuan rorellai, Liberal Demo­cractic Party (LDP) chu vawiin hian General Coun­cil meeting neiin, an party hruaitu thar tur thlan dan tur chungchang an ngaih­tuah dawn tih a tarlang. September 13-15 chhungin party president tur hi thlan fel hman an tum a, hemi hnu September 17-ah Prime Minister thar thlang turin Parliament special session hi koh an tum a ni. 

Abe thlak tura sawi zingah hian LDP Policy Research Council chairperson Fumio Kishida leh LDP Secretary-General leh defence minister hlui Shigeru Ishiba te chu sawi lan an ni a, chief cabinet secretary Yoshihide Suga hming pawh sawi lan a ni bawk. Mipui ngaihdan laknaah Abe thlaktu atan hian Shigeru Ishiba duhtu an tam ber a, 34% in an duh laiin Suga duhtu hi 14% an awm. 

Japan PM hi direct-a thlan a ni lo a, Parliamentary political system hmangin Parliament member-ten an thlan a ni. PM atan hian rorellai party hruaitu chu PM atan thlan a ni tlangpui a ni. 

Japan PM Shinzo Abe chuan a ban thu a sawi hnu lawkah US president Donald Trump hnenah ram pahnih inkungkaihna chu a awm loh hnuah pawh a ṭha reng dawn a, an inzawmna tihdanglamin a awm dawn lo tih a hrilh niin nimin khan Japan sorkar thupuangtu chuan a sawi. 

Deputy Chief Cabinet Secretary Akihiro Nishimura chuan Shino Abe chuan ram pahnih inkungkaihnaah thil danglam thleng a awm dawn lo a ni tih Trump chuan hria se a duh tih a sawi a, niminah khan Abe leh Trump hi darkar chanve vel telephone hmangin an inbia tih a sawi a ni. 

White House thupuangtu pawhin Shinzo Abe chu 'Japan History-a Prime Minis­ter ropui ber' tiin Trump chuan a sawi tih a tarlang ve bawk. 

Nishimura chuan missile defence strategy thar chungchangah pawh Japan chuan US chu an thawhpui zel dawn tih a sawi bawk.