Hamas hruaituin an mi leh sate inpe turin a duh

Israel sipaiten an man, Hamas Nukhba Brigade commander, Abu al-Baraa chuan Israel security agency, Shin Bet-in thu an zawhfiahnaah, Hamas fighter-te chu an vaia inpe mai tura chah a duh thu a sawi.

Shin Bet chuan Abu al-Baraa thu an zawh ṭhenkhat hi an tichhuak a, hetah hian man a nih dan leh, a ṭhiante ṭhenkhat nen Israel sipaite kuta an inpek dante a sawi.

Israel sipaite hian Abu al-Baraa hi Khan Yunis-a leiverhah Hamas firfiak ṭhenkhat dang nena an biru lai an man a, an kut aṭang hian silai, RPG leh puak thei thil dangte an man tel bawk. Tunnel aṭang hian hruai chhuakin, Shin Bet interrogation room-ah thu zawhfiah tura hruai a ni.

Shin Bet-in thu an zawhfiahnaah, Abu al-Baraa chuan kum 2009-ah Hamas chu a zawm tih a sawi a, sipaiten an man hma khan a ṭhian ṭhenkhatte nen chuan inpek an lo duh sa tawh tih a sawi. Tunnel-a an luh hian sipaite hian silai an hmetpuak lo tih a sawi bawk. Hamas member dangte pawh inpe vek tawh tura a duh thu sawiin, an inpe lo a nih chuan an tawpna chu thihna a ni dawn tho a ni, a ti.

US-in Rafah-a beihpui thlak tum a thlawp lo

Israel prime minister Benjamin Netanyahu-a'n Gaza Strip-a Rafah khawpui luhchhuah tura inralring tura an sipaite thu a pek hnuah, US chuan ruahmanna fel tak awm loa Rafah-a beihpui thlak tum chu a thlawp dawn lo tih a sawi.

White House chuan Rafah-a refugee awm mekte dinhmun tur ngaituah hmasak phawt loa Israel-in sipai tirh luh a tum a nih chuan a ṭha dawn lo hle tih a sawi. Ruahmanna fel tak nei loa hma an lak ngawt chuan chhiatna rapthlak tak a thleng dawn a, hei hi an thlawp thei dawn lo tih a tarlang.

Rafah hi Gaza Strip-a khawpui lian niin, Egypt ramri bul lama awm a ni. Israel sipaiten Gaza Strip-a beihpui an thlak hnuah khan mi tam tak chu Rafah khawpuiah hian himna zawngin an tlanchhia a, tunah hian Gaza-a mihring awm zinga a zahve chuang zet chu he khawpuiah hian an khawsa mek nia sawi a ni.

Israel ram ṭhianṭha, US hian Gaza-a Israel sipaite chet danah, tun ṭuma a thil sawi bak chu Israel sipaite beihpui thlak chungchangah hian sawi a nei khat hle.

UN secretary-general Antonio Guterres pawhin Rafah-a sipaiten beihpui an thlak leh chuan dinhmun chhe tak an tawn mek chu a chhiat belh lehzual dawn a ni, a ti.