President Biden-a'n a hriatrengna a ṭhat thu a sawi

US President Joe Biden chuan a chungchang an chhuinaah, top secret file a vawnṭhat dan a fel tawk lo tia report tihchhuah chu na taka chhangin, a hriatrengna chu a la ṭhat vek thu a sawi.

Department of justice special counsel, Robert Hur chuan President Biden-a'n document pawimawh, military leh foreign policy kaihhnawih thilte a vawn ṭhat dan chu a fel tawk lo hle tih a sawi. Hei hi chhui chiannaah pawh finfiah a ni a, Hur pawh hian kum 81 mi, President Biden hi darkar nga chuang zet a kawm chiang a ni. Mahse thubuai erawh siamsak a ni lo thung.

President chungchang an chhuina report, phek 345-a chhahah hian Biden-a hriatrengna chuan ṭhat tawk lo chang a nei ṭhin nia tarlan a ni.

Republican lamin an ruat, special counsel hian Biden chuan vice-president a nih lai (2009 - 2017) leh kum 2015-a a fapa, Beau thih lai hun vel a ngaihtuah chhuak zo lo niin a tarlang. Hei hi chhangin, President Biden chuan a hriatrengna a ṭha vek tih a sawi thung a, heng chungchang zawhna an zawh chu an tana lo buaipui tur a ni tih ngaithuahin, a sawichhuak kher a ngai lo nia a ngaih zawk thu a sawi.

Nikum October 8-9 a special counsel-in interview a neihpui lai khan, Israel-Gaza indona rawn inṭan chhoh lai anih avangin, a rilru chu thil dangin a luah nasa lutuk niin Biden chuan a sawi bawk.

Biden hian eptu lam bakah anmahni party aṭang ngei pawhin President dinhmun chelh tur chuan a kum a upa tawh nia beihna pawh a tawng fo. Mahse President thlanna neih turah Democratic party candidate nih leh ngei tumin a bei mek a, US President ni tura qualify ber leh, he hna hlenchhuak thei ber tur a nih thu a sawi.