Ukraine President-in sipai hotu lu ber a ban

Ukraine president Volodymyr Zelenskyy chuan Ukraine armed force commander-in-chief General Velerii Zaluzhnyi a ban a, a thlaktu turin General Oleksandr Syrskyi a ruat nghal.

Gen Zaluzhnyi leh President Zelenskyy hi Russia-in an ram a run chungchanga hma lak an duh danah an ngaihdan a in ang lo fo nia sawi a ni. Ningani-a Gen Zaluzhnyi ban a nih thu a puan rual hian President chuan high command chu tuaithar a ngai a, Gen Zaluzhnyi pawh chu management team-ah a la awm chhunzawm zel dawn tho niin a sawi.

Ukraine sipai leh mipuite chuan Gen Zaluzhnyi hi an ngaisang hle a, hero ang hialin an ngai. Mipui ngaihdan lak hnuhnun berah pawh President Zelenskyy aiin duhtu a ngah zawk a ni.

President chuan Gen Zaluzhnyi nen hian inpawh taka inbiain, an sipaite dinhmun siam danglam ngaite pawh an sawi dun tih a tarlang. Russia-in a beihna laka Ukraine tana huaisen taka a lo din ṭhin avangin General chu a fak thu a sawi bawk.

Army chief thar atana ruat, Gen Syrskyi chu indona lamah defensive leh offensive lamah tawnhriat nei ṭha tak a ni tih President chuan a sawi. Kum 2022, February thlaa Russia-in Ukraine a run tirh aṭang khan, an ram khawpui Kyiv venhimna thawktu lama hotu ber a ni. Hei bakah Russia bei let a, Kharkhiv hmuna beihpui an thlak chungchangah pawh a ruahmantu ber a ni bawk.