Brazil President hlui Bolsonaro passport lak sak

Brazil police-te chuan an ram president hlui, Jair Bolsonaro chu inthlan result thlak danglam tum leh, sorkar paihthlak a nih theihna tura sipai hotute hmin a, Supreme Court justice jail-a tantir tuma hma laah puhin, a passport an lak sak.

Ningani khan sorkar paihthlak tuma hmalakna nia sawi kaihhnawihah hian police-te chuan Bolsonaro hnuaia minister lo ni tawh mi palite in dapin, mi dang ṭhenkhat an man bawk.

Kum 2022-a inthlan neihah, Bolsonaro hian Luiz Inacio Lula da Silva a hneh zo lo a, mahse President Lula kaihhruai sorkar hi sipai chakna hmanga paihthlak a tum nia puh a ni a, a thawhpui hnaivaite nen chhuichian mek an ni.

Hetih lai hian Bolsonaro chuan an puhnate hi a pha a, 'Kum khat chuang liam taah khan sorkar ka chhuahsan tawh a, tun thlengin beih erawh ka la tawk chhunzawm thung a ni. Kei chu min buaipui tawh suh u, midangin ram hi a enkawl tawh e," a ti. President hlui hi inthlan chungchangah thu dik tawk lo thehdarhah puh a nih avangin kum 2030 thleng inthlan chuh thei lo tura a chungthu relsak a lo ni tawh bawk.