Nevada Republican caucuses-ah Trump a chak

Kumin November thlaa US President thar thlanna neih tura Republican party candidate inchuhna kal zelah, President hlui Donald Trump chu Nevada caucuses-ah a chak.

Nevada caucuses-ah hian Trump hi candidate langsar zinga chuhtu awmchhun a ni. UN ambassador hlui, Nikki Haley chuan Trump duhsak bikna a awm nia sawiin a chuh ve duh ta lo a ni. Trump hian vote tla aṭanga 99% chuang a hmu pha.

Trump hian Nevada-a hnehna a chan avang hian state delegate 26-te a chang thei dawn a, party official nominee thlannaah hnehna chang tur hian delegate 1,215 a neih phak a ngai ang.

February 24 hian South Carolina primary neih a ni leh dawn a, he state-a hian Trump hi a langsar a, hnehna pawh a chan leh ngei rin a ni. Mahse South Carolina governor thlana ṭum hnih lo chak tawh, Haley chuan home state advantage a neih a inbeisei thung.

Trump hi Republican presidential candidate nih tuma an inchuhnaah state pathumah a chak ta a ni. Nevada hma hian Iowa leh New Hamsphire-ah a lo chak tawh a, hei bakah hian US Virgin Islands-ah a chak bawk. Party candidate ni thei turin a dinhmun a siam ṭha chho zel.