Gaza-a UN agency headquarters hnuaiah Hamas tunnel hmu chhuak

Israel sipaite chuan Gaza City-ah UN agency for Palestinian refugee, UNRWA headquarters hnuaiah Hamas firfiak pawl tunnel siam an hmu chhuak tih an sawi.

Gaza-a UNRWA hnuaia thawk eng emaw zat chu Hamas pawla tel leh, Hamas-te thlawpah Israel hian a lo puh fo tawh a ni. Tun ṭuma an tunnel hmuh chhuah hi Hamas ho hian electrical supply room atan an hmang niin an puh. An tunnel hmuh chhuah en tur hian journalist-te pawh an sawm a ni.

UNRWA facility hnuaia tunnel hi Hamas-te siam ngei a ni em tih finfiahna erawh an tilang lo a, mahse Israel sipaite chuan UN agency headquarters aṭang hian he tunnel tan hian electricity pek a ni ngei tih erawh an sawi. UNRWA erawh chuan an headquarters hnuaiah hetiang facility hi a awm tih an hre lo niin an sawi thung.

Headquarters hi Gaza City khawthlang lam tawpa awm niin, tunah erawh tihchhiat a ni tawh. He tunnel hmu chhuak tur hian Israel sipaite chuan kawng hrang hrangin hma an la a ni. Tunnel an hmuh chhuah hi km chanve vela thui niin, kawngkhar pawh 10 a awm. Leiverh hmun ṭhenkhat aṭang chuan chung lam thlir chhoh theihna tur kua pawh siam a ni bawk.

Israel sipaiten an thil hmuh chhuahte enpui tura an hruai, journalist-te chuan UNRWA building chhungah computer dahna room, lei hnuai lama a wire kalthlak tirna pawh an hmu tel. Heng wire-te hi leiverh chhunga room pakhatah an thlunzawm a ni.

Hamas ho hian Gaza-ah hian hmun tam takah leiverh hi siamin, tuna Israel-in beihpui a thlak mekah pawh heng leiverhte tihchhiat hi an tum ber pakhat a ni. Isralel chuan leiverh hi Hamas ho hian an mi leh sate awmna atan te, ralthuam leh supply dang dahna atante an hmang ṭhin niin an sawi. Hamas ho chuan civil mite chu inphenna atan hmangin, mosque, school leh UN facility ho bulah tunnel hi eng emaw zat an hmu chhuak tawh tih an sawi.

UNRWA communications director Juliette Touma chuan agency chuan an building hnuai lama thil awm chu engmah an hriat loh thu leh, he facility pawh hi vawi eng emaw zat a tlawh a, electrical room pawh hi a lo hriat loh thu a sawi. Nikum September thla pawh khan building hi an endik niin a sawi ve thung.