Myanmar sipai sorkarin kum 2 chhung sipaia ṭan ngaihna dan tinung thar

Myanmar sipai sorkar chuan an ram ṭhalai, mipa leh hmeichhia huam vekin, kum hnih chhung tal sipaia an ṭanna tur dan an neih chu kar liam ta Inrinni khan a tinung thar leh.

Sipai sorkar hmasa khan kum 2010-ah Military Servive Law hi pass-in, he dan hnuaiah hian ṭhalai, mipaah kum 18-45 inkar leh hmeichhiaah kum 18-35 inkarte chu kum hnih chhung armed force-a an telna tur telh a ni a, emergency hunlai chuan sipai an ṭan hun hi kum nga thleng pawhsei theih a ni bawk.

Kum 2021-a Aung San Suu Kyi kaihhruai civil sorkar paihthlatu sipai sorkar , State Administration Council hian tun hnaiah ram chhung hmun hrang hrangah hnam bil pawlte aṭanga beihna an tawh chhoh nasat leh tak vangin, he dan hi an rawn tuaithar leh nia ngaih a ni.

Sipai sorkar thupuangtu, Maj Gen Zaw Min Tun pawhin an ram dinhmun thlirin, he dan hi hman a ṭul niin a sawi a, he dan hmang hian hmelmate lo chak zel tur lo dangin, an rama indona chhuak tur an dang thei dawn niin a sawi.

Sipaiten civil sorkar thuneihna an hnehchhuh hnuah, ram chhung hmun hrang hrangah sipai sorkar dodalna hi lantir chhunzawm reng a ni. Sipai sorkar dodaltuten civil sorkar aiawhtu atana an din, National Unity Government chuan sipaiten thuneihna an chan hnuah, sipai aṭanga bang hi 14,000 chuang an awm tawh niin a tarlang.