Hungary President Novak a bang
Hungary conservative president, Katalin Novak chu mipat hmeichhiat lam hawia naupang khawih thubuai nei mi pakhat a ngaihdam chungchangah sawiselna nasa tak a tawh hnuin, Inrinni khan President a nihna aṭangin a bang.
Kum 2022 khan Novak hi Hungary President atan lakluh niin, hmeichhe zinga he dinhmun chelh thei hmasa ber a ni. Novak hian TV-ah a ban thu hi puangin, thutlukna a siamna kawngah a tihsual thu leh, hei hian ram chhunga boruak ṭha lo a chawh chhuah thu pawh a hria tih sawiin, pawi a tiin a inchhir hle tih a sawi.
Kum 46 mi, Novak chuan, "An rilru ka tihnat sakte chungah ngaihdam ka dil a, a hetiang thil lo tuartu zawng zawngte hnenah pawh hetianga chetna hi ka thlawp ngai lo tih ka sawi duh. Naupang leh chhungkua venhim duhtu hi ka ni a, ka ni reng zel ang," a ti.
President ban hnuah hian justice minister Judit Varga pawhin President ngaihdamna hi a lo pawmpui a ni tih sawiin, MP a nihna aṭanga a ban thu a puang ve nghal bawk.
Novak a ban tak avangin, President dinhmun lo chelh lailawk tur hian Parliament Speaker Laszlo Kover ruat a ni. A ni hi nikuma Forbes Magazine-in Hungary-a hmeichhe huhang ngah bera a lo thlan kha a ni.