Pakistan inthlanah party mala sorkar siam thei awm lo

Pakistan ram inthlanpui result chu nimin khan Election Commisison of Pakistan (ECP) chuan puangin, party mala sorkarna siam thei an awm lo.

Inthlanah hian jail-a tang mek, prime minister hlui Imran Khan-a party, Pakistan Tehreek-e-Insaaf (PTI) thlawptu independent candidate-ten seat la hnem berin, seat 101 an la. Mahse sorkarna siam tura seat neih ngai zat erawh 32 in an pha lo.

Sipaiten an thlawp leh, tun ṭum inthlana chak tura rin kai, Nawaz Sharif-a party Pakistan Muslim League (N) chuan National Assembly-ah hian seat 73 chauh an la pha thung. Bilawal Bhutto Zardari kaihhruai Pakistan People's Party (PPP) chuan seat 54 an la ve bawk.

Imran Khan leh ṭum ṭhum prime minister lo ni tawh, Nawaz Sharif-te chuan inthlanah hian hnehna changin, sorkar thar an siam dawn niin an sawi ve ve.

National Assembly-ah hian seat 266 awmin, ECP hian inthlan neihna seat 265 zinga 264 result a ti chhuak a, Punjab province-a Khushab bial inthlan result erawh complaint a awm avangin tih chhuah a la ni ve lo thung. Assembly seat pakhat erawh chu candidate thi a awm avangin vote thlak a ni ve lo a ni.