Sipaiten an man hnuah Mali president a bâng
Mali president Ibrahim Boubacar Keïta chu an ram sipaiten an man hnuah president aṭanga a ban thu Thawhlehni-a TV-a thu a sawiah a puang a, an ram parliament pawh tihtawp zui a ni.
Mali mipuite chuan an rama eirukna hluar vang te, an ram economy tlakchhiat vang te leh tualchhung buaina a chhuah fo ṭhin avangin President hi bang tura phutin kumin June thla aṭang tawh khan vawi tam tak nawrh an lo huaihawt tawh a ni. Mahse President hi a ban duh loh avangin Thawhlehni khan an ram sipai, Malian Armed Force-te chuan President chenna in chu luhchilhin Keïta hi an man a, prime minister Soumeylou Boubèye Maïga pawh man tel niin an hreng zui nghal a ni.
Sipaten an man hnuah President Keïta chuan a ban thu hi a puang a ni. Thuneihna a chan avanga thisen luang chhuak tur chu a duh loh thu leh, sipaite an inrawlh tak avanga thlan tur dang a neih loh thu Keïta chuan a sawi. Keïta chuan a kaihhruai sorkar leh Parliament pawh ṭhiah nghal a nih thu a sawi bawk.
A chunga thil thleng chungchangah tumah huat a neih loh thu Keïta chuan sawiin, a ram a hmangaihna chuan an ram mipuite huat a remti thei lo tih a sawi.
President lakah sipaite lungawi lo
Thawhlehnia an ram President mantute hi Kati camp-a deputy head Col Malick Diaw leh commander Gen Sado Camara hote an ni. Sipai ṭhekhat chu an hlawh chungchangah leh firfiakte nena buaina an neih chhunzawm reng avangin president aṭanga bang ta, Keïta chungah lungawi loin a kaihhruai sorkar lakah an hel a ni.
Thawhlehni khan an camp aṭangin sipaite hian ram khawpui lam an pan a, Preident ban phuta mipui pungkhawmte hian sipaite hi an lo lawm bawk a ni. President chenna in luh chilhin, President leh hetih lai a lo awm ve Prime Minister-te chu an man zui ta a ni. Nimin aṭang khan ram pumah zan lamah curfew puan nghal a ni a, boruak leh lei lama ramri zawng zawngte chu khar zui a ni bawk. Col-Major Ismaël Wagué chuan eptute chu inthlan huaihawt tura sawm an nih thu a sawi bawk a ni.
President chhuah turin phut
Mali rama thil thleng an hriat vel leh United Nations leh African Union chuan Mali sipaite chu president an man hi chhuah turin an ngen. Mali rama sipai sorkarna a din tak avangin UN Security Council chuan nimin khan Mali ram chungchang hi ngaituah a tum bawk.
France chuan Mali president man a ni chu pawi an tih thu leh sipaite chetna hi an dem thu a tarlang. France foreign minister Jean Yves Le Drian chuan Mali sipaite chu an awmna hmun, barrack-a kir leh turin a chah. Mali hi France ram awp zinga mi a ni ṭhin a, Mali ram chhunga thil thleng chungchang hi a la ngaihven reng a ni.