Israel-in Rafah aṭangin Hamas hren mi 2 chhanchhuak

Israel sipaite chuan Gaza Strip-a Rafah khawpui aṭangin Hamas-ten an hren mek zinga mi pahnih an chhanchhuak.

Shin Bet, Israel Defence Force (IDF) leh special police force-te chuan nimin zing khan Rafah khawpui laili laia Hamas mi hrente chhanchhuak tur hian beihpui an thlak a, chawhma dar 10 velah an chhanchhuak thei ta a ni. Israel sipaiten an chhanchhuahte hi Argentina mi, Fernando Marman leh Louis Norbeto Har niin kum 61 leh 70 mi an ni. An pahnih hian nikum October 7-a Hamas firfiakten Israel an beih khan an chhungte ṭhenkhat nen an man a, nikum November 23-30 a Israel leh Hamas-in inremna siam a, an mi tangte an inthleng khan an chhungte chu an lo chhuak tawh a ni.

Israel sipaite chuan mi tang chhanchhuak tura thawhchhuah lai hian, Hamas firfiak lamin an thil tum an hriatchhuah lohna turin Hamas Shabura battalion lamah airstrike an nei bawk tih an sawi.

Hamas mi hren an chhanchhuahte hi Nir Yitzhak hmuna uluk taka an ven building chhawng hnihnaah dah an ni a, Israel sipaite hian a hma lamah uluk taka an lo zirchian hnuah, an hrenna hmun hi luhchhuakin Marman leh Har hi an chhanchhuak thei ta a ni. Chhanchhuah hna an thawhnaa Israel sipai leh Hamas-te inbeihnaah hian Hamas mi pasarih an thi nia sawi a ni. Israel sipai lamah thi an awm lo a, hliam na vak lo tuar pakhat a awm thung. An mi chhanchhuahte hi helicopter hmangin Sheba Medical Center panpui an ni a, an hriselna dinhmun pawh a ṭha niin a tarlang.

Israel tan fighter jet part thawn tawh lo turin Netherlands hriattir

Netherlands court chuan an ram sorkar hnenah Israel hnena F-35 fighter jet part a thawn ṭhin chu tihtawp turin a hriattir. Israel hian Gaza Strip a beihna atan hian F-35 fighter jet hi a hmang a ni.

Netherlands-a human rights organisation, Amnesty International leh Oxfam branch-te chuan an ram sorkarin Israel hnena F-35 fighter jet part a thawn chungchangah nikum khan complaint hi an thehlut a, hei hian Israel-in Gaza-a beihna kawngah puiin, humanitarian law palzutna a thlen zual phah niin an sawi. Mahse nikum Dcember thla khan court chuan an complaint thehluh hi hnawlin, sorkar chuan ralthuam a thawnchhuah kawngah zalenna a nei tur a ni, a ti.

Hemi hnu hian rights organisation-te hi appeal court-ah an zualko leh a, nimin khan court chuan Dutch sorkar chu ni sarih chhunga Israel hnena F-35 fighter jet part a thawn chhuahte titawp vek turin a hriattir ta a ni.