Philippines leimina thi 54 an tling tawh

Philippines chhim lam, Masara khuaa kar liam taa leimin nasa tak thlenga thi chu mi 54 an tling tawh a, chin hriat lohin mi 63 an la awm mek bawk.

Davaa de Oro province-a Masara khuaah hian ruah sur nasa avangin kar liam ta Thawhlehni khan rangkachak khur, Apex Mining bulah lei nasa takin a min a, in leh motor-te a chhilh a ni. Chhanchhuah hna hi thawh chhunzawm reng a la ni a, Pathianni khan leiminin a chhilh, ruang 54 lak chhuah an ni tawh tih provincial government chuan a sawi.

Leiminin a chhilh zingah hian rangkachak khura thawk, in lama haw tuma bus pahniha chuangte an tel. Leimin hian lung leh thingkungte a hnawl nasa hle a, feet 2,300 vela sang aṭanga minin, Masara khuaa ram hectre 8.9 vela zau chu a chhilh zui a ni. Chhiatna thleng vang hian he khuaa chhungkaw 1,100 chuang chu hmun him lamah sawnchhuah an ni bawk.

Sorkar lam hotute chuan chhanchhuah hna hi thawh chhunzawm zel a la nih tur thu an sawi a, mahse chin hriat loa awm mekte nungdama hmuh beiseina erawh a awm tawh lo thung. Hetih lai hian ruah a sur chhunzawm zel avang leh, lei a min belh hlauhthawnna a awm reng vangin hna hi an thawk chak thei lo tih an sawi.