Pakistan : PML-N in sorkar siam tumin hma la mek

Pakistan ram inthlanpui neih zawh takah party mala sorkarna siam thei an awm loh avangin, seat la hnem ber dawttu Pakistan Muslim League-Nawaz (PML-N) hruaitute chuan ṭangrual sorkar siampui tur zawngin Pakistan Peoples Party (PPP) leh Muttahida Quami Movement-Pakistan hruaitute an bia.

Official final result tihchhuahah, inthlanpuiah hian jail tang mek, prime minister hlui Imran Khan-a party, Paksitan Tehreek-e-Insaf (PTI) thlawptu independent candidate-te chuan seat an la hnem ber a, seat 97 lain ṭum thum prime minister lo ni tawh, Nawaz Sharif-a party, PML-N hian seat 76 lain an dawt a ni.

Pathianni khan PML-N president Shehbaz Sharif leh seat 54 latu, PPP chairman Bilawal Bhutto-Zardari te chu inbiain, thawhdun dan tur hi an sawidun a ni. PML-N hian PTI thlawptu, independent candidate ṭhenkhat chu an hmin tawh nia sawi a ni bawk.

PML-N in ṭangrual sorkar siam tura rawtna a siamah hian, an party hian prime minister post an chang ang a, president leh National Assembly speaker post chu an thawhpuite an kian thung ang. Pakistan Army chief, Gen Asim Munir pawhin Sharif kaihhruai party-in ṭangrual sorkar siam an tum chu a thlawp thu a sawi.

Hetih lai hian kar liam ta Inrinni khan anti-terrorism court chuan PM hlui, Imran Khan chu amah thlawptuten sipai hmun an beih chungchangah thubuai 12 a neihah bail-a chhuah a phalsak. Mahse heng thubuaiah hian bail phalsak ni mah se, a thubuai dang eng emaw zatah thiam loh chantir a ni tawh avangin Khan hi jail-ah a la tan chhunzawm tho a ngai a ni.