Hamas beihna tuartuten UNRWA firfiak pawla puan phut

Palestinian firfiak pawl, Hamas-ten October 7, 2023-a Israel an beihna tuartute chuan Gaza Strip-a Palestinian-te chhawmdawlna hna thawktu, United Nations Relief and Works Agency for Palestine Refugees in the Near East (UNRWA) chu firfiak pawla puan an phut.

October 7-a rawng taka beihna tuartute aiawhin, Shurat HaDin Law Center chuan Israel Defence Ministry hnenah an thil phut hi a thlen a, firfiak pawla UNRWA puanna tur dan tlawhchhan ṭha tak pawh a awm a ni, an ti. An thil phut hi defence minister Yoav Gallant hnenah an thehlut.

Defence Minister hian Shurat HaDin Law Center ngenna hi a pawm a nih chuan, a thuneihna hmangin UNRWA hi terrorist organisation-ah a puang thei dawn a, mahse Shin Bet security service lam thurawn a la phawt ang.

Law Centre president, attorney Nitsana Darhan-Leitner chuan, "Mi tupawhin UNRWA hian Hamas-ten pawikhawihna an thlenna turin kawng a hawnsak reng tih an hrechiang vek tawh. Humanitarian organisation anga inlantirin, anmahni ngei chu firfiak pawl hmunpui berah an chang thung. An thawktu ṭhenkhatte chuan Juda mi pawisawilote chu an kut ngeiin an tihlum a ni," a ti.

Israel hian UNRWA mi leh sate ṭhenkhat chuan Hamas hi thlawpin, Israel an beih ṭum pawh khan tel an awm niin a sawi a, hei bakah Israel mi tam tak tihhlum an nih te khan an awm hmunah an lo lawm niin a lo sawi tawh. Hemi hnu hian Israel sipaiten Gaza Strip-a UNRWA headquarters hnuaiah Hamas leiverh, UNRWA headquarters nena inthlunzawmna awm an hmuchhuak zui leh bawk.

Darshan-Leitner chuan, "UNRWA hi humanitarian agency a ni tawh lo, tunah chuan a jihadi group dik tak a ni tawh. Defence Minister hian terrorist organisation-a a puanna tur finfiahna leh dan tlawhchhan a awm vek a ni. He thil hi an kut tuarte awm zel tur venna atan leh, Gaza Strip-a Hamas rorelna paihthlakna turin a ṭul a ni," a ti.

Shurat HaDin tum ber chu firfiaka chetna do let a, khawvel hmun hrang hranga Juda hnam dikna chanvo humhalh sak a ni. An hmunpu hi Tel Aviv-ah a awm. October 7,2023-a Hamas-ten Israel an beih hnuah khan legal war room siamin, Hamas leh a thlawptu laka Israel-in beihpui a thlak chungchangah Israel leh a hmalakna thlavang hauhin hma an la a, International Criminal Court (ICC) prosecutor pawh Israel ram a chhuinaah awn lam nei leh dik tawk lo taka thil kalpuia puhin a lakah complaint pawh an lo thehlut tawh a ni.