US, UK leh EU-in Pakistan inthlanna chhui chian an duh

Pakistan ram inthlanpui neih zawh taka thil fel tawk lo awm nia sawi chu chhui chiang tura an duh thu US, UK leh EU chuan an tarlang.

February 8 khan Pakistan ram inthlanpui hi neih a ni a, official result pawh tichhuak tawhin party mala sorkarna siam thei an awm lo. Prime minister hlui Nawaz Sharif kaihhruai PML-N chuan ṭangrual sorkar siam tumin hma an la mek.

EU chuan inthlan neih dawn hian politician ṭhenkhat, inthlan chuh thei loa dan an ni a, hei bakah mipui punkhawm khap leh internet tihtawp a ni te chu a fel tawk lo tih a sawi. US State Department pawhin inthlan vuakveta tharum thawhna thleng leh media worker beih an nih thute sawiin, freedom of expression chungchangah pawh khuahkhirhna a awm a ni, a ti. Britain foreign mnister David Cameron chuan inthlana vote thlakte chungah lawmthu a sawi rualin, dik taka dan kenkawh a ṭul thu a sawi ve bawk.