Thailand PM hlui Thaksin Shinawatra jail aṭangin chhuak dawn

Thailand prime minister hlui, a thuneihna dik lo taka hmanga puha kum riat tang tura hrem, Thaksin Shinwatra chu jail aṭanga chhuah a ni dawn.

Prime minister Srettha Thavisin chuan PM hlui Thaksin hremna hi kum khatah tihtawi sakin parole-in a chhuak thei tawh dawn tih a sawi.

Thaksin hi PM aṭanga paihthlak a nih hnuah thubuai siamsak niin, ram pawnah a tlanchhe zui a ni. Ram dangah kum 14 chuang a awm hnuin, nikum August thla khan Thailand-ah a kir a, a kir hnu hian a thuneihna dik lo taka hmanga puh chungchangah court-ah hruai nghalin, kum riat tang turin hrem a ni a, jail-ah dah nghal a ni. Mahse an ram lalin ngaidamin, kum riat tang tura tih chu kum khat atan a tihniam sak a ni.

Manchester City football club neitu hlui, billionaire Thaksin Shinawatra hi Thailand prime minister atan hian vawi hnih thlan tlin a ni a, kum 2006 khan sipai chakna hmangin paihthlak a ni. Ram danga a tlanchhiat chhung hian a hun tam zawk hi Dubai-ah a hmang a ni.

Tuna Thailand prime minister ni lai, Srettha Thavisin hi Thaksin-a fanu, Paetongtarn Shinawatra kaihhruai Pheu Thai Party ami a ni a, an ram inthlanpui neih hnuah nikum May thlaa a ṭang khan an party hian sorkar hi an siam a ni. A fanu party-in sorkarna a siam hnuah, Thaksin pawh hi an ramah hian a kir leh duh ta chauh a ni.