Pakistan-ah ṭangrual sorkar ding dawn : Prime Minister atan Shehbaz Sharif nominate

Pakistan-a ṭangrual sorkar din turin Pakistan Muslim League-Nawaz (PML-N) leh Pakistan Peoples Party (PPP) chuan inrmena an siam thei ta a, PML-N hruaitu Nawaz Sharif chuan prime minister atan a nau, Shehbaz Sharif a nominate.

Inthlanpui neih zawh takah hian jail-a tang mek, prime minister hlui Imran Khan-a party, Pakistan Tehreek-e-Insaf (PTI) thlawptu independent candidate-te chuan seat la hnem ber mah se, majority erawh an nei pha lo. Hei vang hian seat la hnem ber dawttu, PML-N hian party dang thawhpuiin ṭangrual sorkar an siam dawn ta a ni.

PML-N kaihhruai ṭangrual sorkar hi Bilawal Bhutto-Zadari party, PPP-in a thlawp bakah, seat 17 latu,Muttahida Qaumi Movement-Pakistan (MQM-P) pawhin an thlawp bawk a ni. Pakistan Army chuan PML-N hi an thlawp nia sawi a ni bawk.

Seat 265-a inthlan neihna, National Assembly-a majority nei tur hian seat 133 neih phak a ngai a, PML-N hian seat 75 neiin, PPP hian seat 53 an nei bawk. MQM-P in an thlawp ve leh tak avangin sorkarna siam tura seat ngai zat hi an nei thei ta a ni.

Pakistan prime minister ṭum thum lo ni tawh, PML-N hruaitu Nawaz Sharif chu prime minister-ah a ṭum lina atan a awm leh dawn nia ngaih a nih laiin, a nau chu PM atan a rawn nominate ta zawk a ni. Nawaz Sharif-a fanu, Mayram Nawaz chu Punjab province chief minister atan nominate a ni bawk a, Pakistan chanchina chief minister atana hmeichhia nominate a nihna hmasa ber a ni.