Indonesia President thar tur thlang

Indonesia mipuite chuan nimin khan an ram President thar tur thlangin vote an thlak a, vote nei hi mi maktaduai 200 chuang an awm.

President ṭanglai, Joko Widodo, 'Jokowi' tia hriat lar chu an ram mipuiah la tla na viau mah se, term hnih a hman zawh tawh avangin a chuh nawn thei lo a, hei vang hian kum 10 hnuah President thar an nei dawn a ni.

Indonesia President thar thlan turah hian candidate pathum, Prabowo Subianto (72), Ganjar Pranowo (55) leh Anies Baswedan (54) te an awm. Probowo hi military general, defence minister ni lai, nationalist right-wing party hotu a ni a, party dang Golkar leh National Mandate Party (PAN)-te'n an thlawp bawk. Kum 2014 leh 2019 inthlanah khan a lo chuh tawh a ni. President Widodo fapa upa ber, Gibran Rakabuming Raka a thawhpui.

Ganjar hi Central Java governor hlui leh, Indonesian Democratic Party of Struggle (PDI-P) member a ni. Inthlanah hian security minister hlui leh Constitutional Court-a chief justice hlui, Mohammad Mahafud a thawhpui. Chhungkaw lamah politics lama chhuan tur a nei hran lo a, mahse, a agenda ṭha tak avangin Indonesia province lian ber zingah ṭum hnih governor lo ni thei a ni.

Anies hi Jakarta governor hlui ni bawkin, minister of education and culture a lo ni tawh. Academic leh activist a ni bawk. Tun ṭum inthlanah hian a thawhpui, Mhaimin Iskandar nen Coalition of Change for Unity tih hmingin an chuh.

Mipuite hian President bakah, vice president, parliament member, provincial leh district representative-te an thlang nghal dawn a ni. Indonesia-ah hian national political party 18 awmin, parliamentary seat 575-ah inthlan hi an nei a, candidate 10,000 vel an awm.