US Homeland Security Secretary lakah impeachment vote la

US House of Represenatives chuan Homeland Security Secretary, Alejandro Mayorkas chu US-Mexico ramri katlanga an rama dan loa pem lut an pun tamna chhanah mawhphurtua puhin, ban a nih theihna turin House-ah impeachment vote hi an la a ni.

Kar hmasa lam khan vote lak hi tum ni mah se an ti thei lo a, Thawhlehni khan an la ta a ni. Alejandro Mayorkas hi kum 150 dawn chhunga cabinet member zinga impeachment hmachhawn hmasa ber a ni.

Republican member tamna chamber-a vote lakah a thlawp lamah vote 214 tlain, a thlawp lo lamah vote 213 a tla thung. Impeachment thlawp lo lamah hian Republican member pathumin an vote ve bawk. Democrats lam chakna, Senate-ah ngaihtuah a ni ve leh dawn a, mahse, hetah hian a tlang a rinawm loh thung.

President Joe Biden chuan House-a vote an lak hi an ram danpui kalphung lo leh, politics-a inbeihna niin a puh.

Hetih lai hian Republican lam chuan Mayorkas hi a hna thawk tura a thutiam, rinawm leh ṭha taka a chanvo kenkawh tih chu vawng loa puhin, ramri himna tura thawk ṭha tawk loah an puh.

Kum 2021 aṭang khan US-ah hian dan loa pem lut mi maktaduai 6.3 chuang an awm tawh a, hei vang hian kumina President thar thlanna neih tura campaign au hlaah pawh immigration chungchang hi an sawi tam hle. Republican presidential candidate tura rinkai ber, Donald Trump pawhin President Biden beihna atana a hmang nasa a ni.