Khawvel ram economy lian palinaah Japan tla thla

Sorkar data-a tarlan a nih danin Japan chu khawvel ram economy lian palinaah tla thlain, ram economy len lamah Germany-in a lehpel. January 15 khan data hi tihchhuah niin, Japan hian Germany hi a tluk tawh lo a, US chu economy ṭha ber ram niin China-in a dawt.

Data-ah hian Japan-in khawvel ram dangte el tura a theihna a tlakhniam zel dan leh thil siamchhuah lama an tlakhniam dan te tarlan a ni a, Japan-a fa neih tlem avanga mihring an pun theih lohnate chu tarlan a ni bawk. Japan economy hi 2010 hma lam khan khawvel pumah pahnihna a ni ṭhin a, 2010 khan China chuan rawn lehpelin ram economy lian pathumna an ni a, tunah hian Germany chuan rawn lehpel ve lehin palina an ni ta a ni.

Ram hrang hrangte economy khaikhinna hi nominal GDP hmanga teh a ni a, Japan GDP hi nikum khan 4.2 trillion dollar anga chhut a ni a, hei hi an ram pawisa chuan 591 trillion yen a ni. Hetih lai hian thla hmasa khan Germany ram economy hlutna chu 4.4 trillion dollar nia chhut a ni a, hei hi pawisa thlengna hlut dan a zirin 4.5 trillion dollar anga chhut theih a ni bawk. Cabinet data on real GDP-in a tarlan danin, nikuma quarter hnuhnung ber, October - December chhung khan Japan economy hi quarter hmasa lam aiin 0.4% leh minus 0.1% tein a tlahniam.

University of Tokyo-a economics professor, Tetsuji Okazaki chuan data chhuah tharin Japan chau mek a lantir thu leh, khawvel huapa an dinhmun a tihhniam thu sawiin,"Kum eng emaw kal taah kha chuan lirthei siamna lamah Japan hi a inchhuang ṭhin, Japan hian a inchhuanna ber pawh tunah chuan electric motor siamchhuah a nih avangin inchhuanna tur a nei tawh lo a ni. Ram ṭhang mek leh ram changkang tawhte inkar hi a zim zel a, kum rei lote chhungin nominal GDP-ah hian India pawhin Japan hi a lehpel vat ang," tiin a sawi.