Russia-in cancer vaccine a peih ṭep tawh : Putin

Russia President Vladimir Putin chuan an ram scientist-te chuan cancer natna vei enkawlna tur vaccine an siam chu hman ṭan tura an peihfel ṭep thu a sawi.

President Putin chuan,"Cancer enkawlna tur vaccine chu kan siam zo thei ṭep tawh a, immunomodulatory damdawi chi thar a ni ang" a ti. Moscow forum-a hmasawnna hmathlir neihnaa thu a sawinaah, Putin chuan an damdawi chu siam zawh a nih hunah ṭangkai taka cancer veite enkawl nan hman a nih ngei a beisei thu a tarlang.

Sumdawng pawl lian tak tak leh ram hrang hrang hian cancer enkawlna tur vaccine hi siamchhuah tumin theihtawp an chhuah ṭhin a, nikum khan United Kingdom leh BioNTech chuan thawh dunna thuthlung ziakin cancer enkawl dan chu mi singkhat (10,000) hnenah kum 2030 hmain enchhin turin an inrem a ni. Damdawi siamchhuaktu, Moderna leh Merck & Co. pawhin vun cancer hlauhawm ber Melanoma enkawlna tur vaccine chu enchhinna an nei mek a, an enchhinna kalpui mekah an vaccine hmanga Melanoma cancer veite chu kum thum chhung enkawl an nih chuan vun cancer vanga thihna leh cancer vei nawn theihna tam tak a tihniam niin an sawi bawk.

Cancer tam tak thlentu papillomaviruses (HPV) enkawlna tur atan vaccine paruk chu license a awm thu World Health Organisation chuan a sawi a, heng vaccine zingah hian cervical cancer leh hepatitis B (thin cancer thlen theitu) pawh an tel. Russia hi vaccine siamchhuah kawngah hian an thawhhlawk hle a, Covid laia an vaccine siamchhuah Sputnik V pawh ram tam takah an hralh chhuak a ni.